கனடா, மிசிசாகா (Mississauga) நகரின் மிகப்பெரிய விளையாட்டு மற்றும் பொழுதுபோக்கு அரங்கமான ‘பாரமவுண்ட் பைன் புட்ஸ் சென்டர்’ (Paramount Fine Foods Centre), ஜூன் 1 ஆம் திகதி முதல் தற்காலிகமாக ‘மிசிசாகா ஸ்போர்ட்ஸ் அண்ட் எண்டர்டெயின்மென்ட் சென்டர்’ (Mississauga Sports and Entertainment Centre) எனப் பெயர் மாற்றப்படவுள்ளதாக மாநகர சபை அறிவித்துள்ளது.
சுமார் 1.6 மில்லியன் டொலர் கட்டணப் நிலுவையை பாரமவுண்ட் உணவக நிறுவனம் நீண்ட காலமாக செலுத்தத் தவறியுள்ளது.
அதனுடன் 10 ஆண்டுகால பெயரிடும் உரிமை ஒப்பந்தத்தை (Naming rights agreement) ஒருதலைப்பட்சமாக ரத்து செய்துள்ளதாக மிசிசாகா மாநகர சபை செவ்வாய்க்கிழமை தெரிவித்தது.
மேலும், வரிப்பணத்தைப் பாதுகாக்கும் நோக்கில் இத்தொகையை மீட்டெடுக்க சட்ட நடவடிக்கை எடுக்கப்படும் என மேயர் கரோலின் பாரிஷ் (Mayor Carolyn Parrish) உறுதிப்படுத்தியுள்ளார்.
அத்துடன், அரங்கின் உணவு விநியோக சேவைகளையும் மாநகர சபையே பொறுப்பேற்கவுள்ளது.
எனினும், மாநகர சபையின் இந்த அறிவிப்பு தவறானது மற்றும் ஒருதலைப்பட்சமானது என பாரமவுண்ட் நிறுவனத்தின் நிறுவனர் முகமது பக்கிஹ் (Mohamad Fakih) மறுத்துள்ளார்.
கடந்த 6 மாதங்களாக இத்தொகையைச் செலுத்தத் தயாராக இருந்தும், இருதரப்பு பேச்சுவார்த்தைகள் நடந்து கொண்டிருக்கும் போதே மாநகர சபை இவ்வாறான பொது அறிவிப்பை வெளியிட்டது தமக்கு ஏமாற்றமளிப்பதாக அவர் குறிப்பிட்டுள்ளார்.
எவ்வாறாயினும், பெயர் மாற்றத்தினால் அரங்கின் தற்போதைய முன்பதிவுகள், நிகழ்ச்சிகள் அல்லது ‘ரெப்டார்ஸ் 905’ (Raptors 905) கூடைப்பந்து போட்டிகளுக்கு எந்தவித பாதிப்பும் இருக்காது என அறிவிக்கப்பட்டுள்ளது.
