Toronto-வின் வடமேற்கு பகுதியில் உள்ள மூன்று வணிக நிறுவனங்களில் திங்கட்கிழமை அதிகாலை அடுத்தடுத்து துப்பாக்கிச் சூட்டு சம்பவங்கள் இடம்பெற்றுள்ளன.
இது குறித்து பொலிசார் தீவிர விசாரணைகளை முன்னெடுத்து வருகின்றனர்.
அதிகாலை 2:45 மணியளவில் Dufferin Street மற்றும் Steeles Avenue West சந்திப்புக்கு அருகில் உள்ள வணிக வளாகம் ஒன்றில் முதல் துப்பாக்கிச் சூடு நடத்தப்பட்டது.
இதில் கட்டிடங்கள் சேதமடைந்தாலும், எவருக்கும் காயங்கள் ஏற்படவில்லை.
அதிகாலை 5:30 மணியளவில், North York பகுதியில் உள்ள Fenmar Drive இல் அமைந்துள்ள GFL Environmental Inc. நிறுவனத்தின் மீதும் துப்பாக்கிச் சூடு நடத்தப்பட்டுள்ளது.
இதனைத் தொடர்ந்து சில நிமிடங்களிலேயே, Etobicoke பகுதியின் Belfield Road மற்றும் Kipling Avenue சந்திப்பில் உள்ள ஒரு நிறுவனத்தில் மற்றுமொரு சம்பவம் பதிவானது.
அங்கு 30 வயது மதிக்கத்தக்க நபர் ஒருவர் காயமடைந்த நிலையில் மீட்கப்பட்டு மருத்துவமனையில் அனுமதிக்கப்பட்டுள்ளார்.
இருப்பினும், அவரது காயம் துப்பாக்கிச் சூட்டினால் ஏற்பட்டதா என்பது இன்னும் உறுதிப்படுத்தப்படவில்லை.
சந்தேகநபர்கள் வாகனத்தில் தப்பிச் சென்றுள்ள நிலையில், அவர்களைப் பற்றிய விபரங்களை காவல்துறையினர் இன்னும் வெளியிடவில்லை.
