கனடாவின் மிகப்பெரிய தங்கக் கொள்ளை – பல வருடங்களாக காவல்துறையின் கண்காணிப்பில் இருந்த ஏர் கனடா ஊழியர்

பியர்சன் விமான நிலைய சரக்கு பிரிவிலிருந்து 22 மில்லியன் டாலர் மதிப்புள்ள தங்கம் மற்றும் வெளிநாட்டு நாணயங்கள் கொள்ளையடிக்கப்பட்ட வழக்கில், பர்மபால் சித்து (Parmpal Sidhu) என்ற ஏர் கனடா ஊழியர் குற்றம் சாட்டப்பட்டுள்ளார்.

இவர் 2008 ஆம் ஆண்டு முதல் மூன்று போதைப்பொருள் கடத்தல் விசாரணைகளில் சிக்கியுள்ளார்.

2012 ஆம் ஆண்டின் ரகசிய உளவுத்துறை அறிக்கையில், பர்மபால் சித்து சர்வதேச போதைப்பொருள் கடத்தல் கும்பலின் தலைவராக செயல்பட்டு, குற்றச்செயல்களுக்காக அரசு நிறுவனங்களுக்குள் ஊடுருவியதாகக் குறிப்பிடப்பட்டுள்ளது.

இருப்பினும், இவருக்கு வழங்கப்பட்ட விமான நிலைய பாதுகாப்பு அனுமதி (Security Clearance) ரத்து செய்யப்படவில்லை.

லெவி டேவிஸ் (Levi Davis) என்ற ஏர் கனடா ஊழியர், 2010 முதல் போதைப்பொருள் கடத்தல் மற்றும் பயணிகளின் சாமான்களில் அடையாள அட்டைகளை மாற்றிய (Bag-tag switching) புகாரில் சிக்கியுள்ளார்.

மணி தலிவால் (Mani Dhaliwal) என்ற பாதுகாப்பு பிரிவு ஊழியர், ஆஸ்திரேலியாவில் (Australia) நடந்த மிகப்பெரிய போதைப்பொருள் கடத்தல் வழக்கில் 2025 இல் கைது செய்யப்பட்டார்.

டெவோன் லாயிட் மெக்லீன் (Devon Lloyd McLean) என்ற ஊழியர், துப்பாக்கிச் சூடு மற்றும் போதைப்பொருள் கடத்தல் வழக்குகளில் தொடர்புடையவராக இருந்தும் தொடர்ந்து பணியாற்ற அனுமதிக்கப்பட்டுள்ளார்.

ஓய்வுபெற்ற RCMP அதிகாரி உலிசஸ் பொடெல்ஹோ (Ulisses Botelho) கூறுகையில், ஒழுங்கமைக்கப்பட்ட குற்றக் கும்பல்களுக்கு (Organized crime) உதவும் பல ஊழியர்கள் குறித்து Transport Canada அமைப்பிற்கு எச்சரிக்கை விடுத்தும், அவர்களின் பாதுகாப்பு அனுமதிகள் ரத்து செய்யப்படாமல் அலட்சியம் காட்டப்பட்டதாகக் குற்றம் சாட்டியுள்ளார்.

கடந்த 5 ஆண்டுகளில் நாடு முழுவதும் 7,500 க்கும் மேற்பட்ட ஊழியர்கள் பாதுகாப்பு சந்தேகங்களுக்கு உள்ளாகியும் அவர்களுக்கு விமான நிலையங்களின் தடைசெய்யப்பட்ட பகுதிகளுக்குள் செல்ல அனுமதி வழங்கப்பட்டுள்ளது அதிர்ச்சியை ஏற்படுத்தியுள்ளது.