டொராண்டோவின் இசை வரலாற்றில் நீங்கா இடம்பிடித்த ‘ஸ்டீவ்ஸ் மியூசிக் ஸ்டோர்’ (Steve’s Music Store), தனது 60 ஆண்டு கால வணிகத்தை நிறைவு செய்துள்ளது.
அதற்கமைய, கடந்த ஞாயிற்றுக்கிழமையுடன் (மார்ச் 22, 2026) குறித்த வணிக நிறுவனம் நிரந்தரமாக மூடப்பட்டது.
ஒன்லைன் வர்த்தகப் போட்டி மற்றும் அதிகரித்து வரும் நிதி நெருக்கடி காரணமாக, ஒன்ராறியோ மற்றும் கியூபெக் மாகாணங்களில் உள்ள தனது கிளைகளை மூடிவிட்டு, மாண்ட்ரியல் (Montreal) நகரில் உள்ள தலைமை கிளையை மட்டும் தக்கவைத்துக்கொள்ள நிறுவனம் தீர்மானித்துள்ளது.
1965 இல் ஸ்டீவ் கிர்மன் (Steve Kirman) என்பவரால் தொடங்கப்பட்ட இந்த நிறுவனம், “வாங்குவதற்கு முன் இசைத்துப் பாருங்கள்” (Try before you buy) என்ற தாரக மந்திரத்துடன் இசைக்கலைஞர்களின் புகலிடமாக விளங்கியது.
டொராண்டோவின் குயின் ஸ்ட்ரீட் வெஸ்ட் (Queen Street West) பகுதியில் 1977 இல் திறக்கப்பட்ட இந்த கடை, நகரின் ‘பங்க்’ (Punk) இசை எழுச்சிக் காலத்தில் முக்கிய மையமாகத் திகழ்ந்தது.
இந்த கடையின் மூடல் குறித்து கருத்துத் தெரிவித்த முன்னாள் ஊழியர்கள் மற்றும் வாடிக்கையாளர்கள், இது வெறும் கடை மட்டுமல்ல, இசைக்கலைஞர்கள் சந்திக்கும் ஒரு கலாச்சார மையம் என உருக்கமாகத் தெரிவித்துள்ளனர்.
குயின் ஸ்ட்ரீட் பகுதியில் 2025 ஆம் ஆண்டு முதல் மூடப்படும் 12-வது முக்கிய வணிக நிறுவனம் இதுவாகும்.
இருப்பினும், ஸ்டீவ்ஸ் நிறுவனம் தனது விற்பனையை இனி ஒன்லைன் வாயிலாகத் தொடரத் திட்டமிட்டுள்ளது
