றொரண்டோவில் (Toronto) உள்ள வாகன நிறுத்துமிடம் ஒன்றில் சனிக்கிழமை காலை சடலமாக மீட்கப்பட்ட நபரின் மரணம், ஒரு கொலை என உறுதிப்படுத்தப்பட்டு பொலிஸார் தீவிர விசாரணை மேற்கொண்டு வருகின்றனர்.
ஆரம்பத்தில் உயிரிழந்தவர் ஒரு பெண் என தவறாக அடையாளம் காணப்பட்ட நிலையில், தற்போது அவர் ஒரு ஆண் என்பதை பொலிஸார் உறுதிப்படுத்தியுள்ளனர்.
கடந்த சனிக்கிழமை காலை 9:30 மணியளவில் மாஸ் பார்க் (Moss Park) அருகே உள்ள டண்டாஸ் ஸ்ட்ரீட் மற்றும் சீட்டன் ஸ்ட்ரீட் (Dundas Street and Seaton Street) சந்திப்பில் அவசர மருத்துவ உதவிக்காக பொலிஸார் அழைக்கப்பட்டனர்.
அப்போது அங்கிருந்த வாகன நிறுத்துமிடத்திற்குள் ஒரு சடலம் கண்டெடுக்கப்பட்டது. பிரேத பரிசோதனையின் முடிவில் இது ஒரு கொலை என்பது தெரியவந்துள்ளது.
உயிரிழந்தவர் 5 அடி 6 அங்குல உயரம், நடுத்தர உடல்வாகு, கறுப்பு நிற தலைமுடி மற்றும் கண்களைக் கொண்ட ஆசிய வம்சாவளியைச் சேர்ந்தவராக இருக்கலாம் என சந்தேகிக்கப்படுகிறது.
அவர் இறக்கும் போது இறக்கைகளுடன் கூடிய வெள்ளி நிற இதய வடிவ பதக்கம் கொண்ட சங்கிலி மற்றும் “விஷன் யூத் லீடர்ஸ் புரோகிராம்” (Vision Youth Leaders Program) என்று எழுதப்பட்ட கறுப்பு நிற ஜாக்கெட்டையும் அணிந்திருந்தார்.
பலியானவரை அடையாளம் காணும் முயற்சியில் பொலிஸார் பொதுமக்களின் உதவியை நாடியுள்ளனர்.
