றொரண்டோவின் நோர்த் யோர்க் (North York) பகுதியில் சுமார் இரண்டு நாட்களுக்கு முன்பு காணாமல் போன 14 வயதுச் சிறுமியைத் தேடும் பணிகளை றொரண்டோ பொலிஸார் தீவிரப்படுத்தியுள்ளனர்.
எஸ்தர் (Esther) என்ற 14 வயதுச் சிறுமி கடந்த வெள்ளிக்கிழமை இரவு 11:30 மணியளவில் பாத்தர்ஸ்ட் வீதி (Bathurst Street) மற்றும் ஷெப்பர்ட் அவென்யூ வெஸ்ட் (Sheppard Avenue West) சந்திப்பிற்கு அருகிலுள்ள ‘ஏர்ல் பேல்ஸ்’ பூங்காவில் (Earl Bales Park) கடைசியாகக் காணப்பட்டுள்ளார்.
5 அடி 2 அங்குலம் உயரமும், நடுத்தர உடலமைப்பும், பழுப்பு நிற முடியும் கொண்ட இச்சிறுமி, காணாமல் போன போது சாம்பல் நிற சுவட்டிங் காற்சட்டை மற்றும் பச்சை நிற நீளக்கைக் சட்டை அணிந்திருந்தார்.
அவர் காலணி அணிந்திருந்தாரா என்பது உறுதியாகத் தெரியவில்லை.
பூங்காப் பகுதியில் அடர்ந்த மரங்கள் மற்றும் பாதைகள் அதிகமாக இருப்பதால், தேடுதல் பணிக்காகப் பொலிஸார் தற்காலிக கட்டுப்பாட்டு மையம் (Command post) ஒன்றை அமைத்துள்ளனர்.
உடலின் வெப்பத்தை அறிந்துகொள்ளும் (Heat signatures) அதிநவீன ட்ரோன்கள், குதிரைப்படை மற்றும் கடற்படையினர் தீவிரத் தேடுதலில் ஈடுபட்டுள்ளனர்.
சிறுமி உணவு, பணம் அல்லது உதவி கேட்டு அருகில் உள்ள காபி கடைகளுக்கு வரலாம் என்பதால், பொதுமக்கள் தங்கள் வீட்டு கண்காணிப்பு கேமராக்களை (CCTV) ஆய்வு செய்யுமாறு பொலிஸ் அதிகாரி ஸ்காட் பிராட்பரி (Scott Bradbury) கேட்டுக்கொண்டுள்ளார்.
சிறுமியைக் கண்டால் உடனடியாகப் பொலிஸாருக்குத் தகவல் வழங்கி, அவர் பாதுகாப்பாக மீட்கப்படும் வரை கண்காணிப்பில் வைத்திருக்குமாறு பொதுமக்கள் அறிவுறுத்தப்பட்டுள்ளனர்.
