அமெரிக்காவிலிருந்து இறக்குமதி செய்யப்பட்ட உணவுப் பொருளை, கனடா நாட்டுத் தயாரிப்பு எனத் தவறாக விளம்பரப்படுத்தியதற்காக Loblaw நிறுவனத்திற்குச் சொந்தமான Superstore கிளைக்கு $10,000 அபராதம் விதிக்கப்பட்டுள்ளது.
President’s Choice பிராண்டின் Broccoli Slaw என்ற தயாரிப்பு, அமெரிக்காவிலிருந்து இறக்குமதி செய்யப்பட்டிருந்தும், கடையில் “Product of Canada” என்ற முத்திரையுடன் விற்பனை செய்யப்பட்டுள்ளது.
Toronto நகரில் உள்ள ஒரு கிளையில் இந்த விதிமீறல் கண்டறியப்பட்டதை அடுத்து, கனடா உணவு ஆய்வு முகமை (CFIA) இந்த நடவடிக்கையை எடுத்துள்ளது.
இதேபோன்ற குற்றச்சாட்டு Sobeys நிறுவனத்திற்குச் சொந்தமான Safeway கடை மீதும் எழுந்துள்ளது.
அங்கு இறக்குமதி செய்யப்பட்ட அவகாடோ எண்ணெய் (Avocado Oil), கனடா தயாரிப்பு என விளம்பரப்படுத்தப்பட்டுள்ளது.
பெரும் இலாபம் ஈட்டும் நிறுவனங்களுக்கு இந்த $10,000 அபராதம் மிகக் குறைவானது என நுகர்வோர் அதிருப்தி வெளியிட்டுள்ளனர்.
தற்போதுள்ள சட்டப்படி ஒரு விதிமீறலுக்கு அதிகபட்சமாக $15,000 மட்டுமே அபராதம் விதிக்க முடியும் என்பது குறிப்பிடத்தக்கது.
