கனடாவில் வேலைவாய்ப்புகளைப் பாதுகாப்பதாக அளித்த வாக்குறுதியை அமெரிக்க நிறுவனமான ‘கிளீவ்லேண்ட்-கிளிப்ஸ்’ (Cleveland-Cliffs) மீறியுள்ளதற்கு எதிராகக் கடுமையான செய்தி அனுப்பப்பட வேண்டும் என கனடாவின் தொழில்துறை அமைச்சர் மெலனி ஜோலி (Mélanie Joly) தெரிவித்துள்ளார்.
ஒன்ராறியோவின் ஹேமில்டன் (Hamilton, Ontario) பகுதியிலுள்ள ‘ஸ்டெல்கோ’ (Stelco) ஆலையில் 500 வேலைவாய்ப்புகளை நீக்கவும், ஆலையின் ஒரு பகுதியை மூடவும் கிளீவ்லேண்ட்-கிளிப்ஸ் நிறுவனம் நடவடிக்கை எடுத்துள்ளது.
இது 2024 ஆம் ஆண்டு முதலீட்டுச் சட்டத்தின் (Investment Canada Act) கீழ் அளிக்கப்பட்ட வாக்குறுதிகளுக்கு எதிரானது என கனடா அரசு சுட்டிக்காட்டியுள்ளது.
அமெரிக்கா விதித்துள்ள வரிகள் மற்றும் இரும்பு விலைக் குறைவே இதற்குக் காரணம் என அந்நிறுவனம் சாக்குப்போக்குக் கூறிய போதிலும், அந்நிறுவனத்தின் தலைமை நிர்வாகி லாரென்சோ கோன்சால்வஸ் (Lourenco Goncalves) அமெரிக்க வரிகளுக்குப் பகிரங்கமாக ஆதரவளித்தவர் என அமைச்சர் ஜோலி சாடியுள்ளார்.
பாதிக்கப்பட்ட தொழிலாளர்களைப் பாதுகாப்பதே அரசின் முதன்மை நோக்கம் எனக் கூறிய அமைச்சர், பணிநீக்கத்தை உடனடியாக நிறுத்தாவிட்டால் நீதிமன்ற நடவடிக்கை, நிதி அபராதம் அல்லது நிறுவனச் சொத்துக்களைக் கட்டாயமாகத் திரும்பப் பெறும் நடவடிக்கைகள் (Divestment) எடுக்கப்படும் என எச்சரித்துள்ளார்.
