பிரிட்டிஷ் கொலம்பியாவில் எரிந்து வரும் காட்டுத்தீகளிலிருந்து பரவும் புகையால், Metro Vancouver மற்றும் Lower Mainland பகுதிகளில் காற்றின் தரம் மோசமடைந்துள்ளது.
Vancouver, Burnaby, New Westminster, North Shore, Richmond, Delta, Surrey, Langley, Tri-Cities, Maple Ridge, Abbotsford, Mission உள்ளிட்ட பகுதிகளுக்கு மஞ்சள் நிலை காற்றுத் தர எச்சரிக்கை விடுக்கப்பட்டுள்ளது. புகையால் காற்றின் தரம் பாதிக்கப்படுவதுடன், காணும் திறன் குறையக்கூடும் என அதிகாரிகள் தெரிவித்துள்ளனர்.
Chilliwack, Agassiz, Hope உள்ளிட்ட Eastern Fraser Valley பகுதிகளில் நிலைமை மேலும் மோசமாக இருப்பதால், மிக உயர்ந்த சுகாதார அபாயத்தைக் குறிக்கும் ஆரஞ்சு எச்சரிக்கை அமலில் உள்ளது. அப்பகுதி மக்கள் வெளிப்புற நடவடிக்கைகளைத் தவிர்க்குமாறு அறிவுறுத்தப்பட்டுள்ளனர்.
இதயம் மற்றும் நுரையீரல் தொடர்பான நோய்கள் உள்ளவர்கள், கர்ப்பிணிகள், சிறுவர்கள், முதியவர்கள் மற்றும் வெளிப்புறங்களில் பணியாற்றுபவர்கள் அதிக ஆபத்தை எதிர்கொள்ளக்கூடும்.
பொதுமக்கள் கடுமையான நடவடிக்கைகளைக் குறைக்கவும், கதவு ஜன்னல்களை மூடி வைக்கவும், வீட்டிற்குள் காற்றுச் சுத்திகரிப்பான்களைப் பயன்படுத்தவும் அறிவுறுத்தப்பட்டுள்ளனர். வெளியே செல்ல வேண்டியிருந்தால் நன்றாகப் பொருந்தும் N95, KN95 அல்லது KF94 முகக்கவசத்தைப் பயன்படுத்தலாம்.
காட்டுத்தீப் புகையின் திசையும் அடர்த்தியும் மணித்தியாலத்திற்கு மணித்தியாலம் மாறக்கூடும் என்பதால், மக்கள் Air Quality Health Index தகவல்களைத் தொடர்ச்சியாகப் பார்வையிடுமாறு அதிகாரிகள் கேட்டுக்கொண்டுள்ளனர்.
