றொரண்டோவின் (Toronto) மேற்குப் பகுதியில் கட்டின்றித் திரிந்த நாய் ஒன்று சிறிய நாய் ஒன்றைக் கொன்றதுடன், அதன் உரிமையாளரையும் காயப்படுத்திய சம்பவம் பெரும் பரபரப்பை ஏற்படுத்தியுள்ளது.
செவ்வாய்க்கிழமை மாலை 4:10 மணியளவில் வெஸ்டன் வீதி (Weston Road) மற்றும் லாரன்ஸ் அவென்யூ வெஸ்ட் (Lawrence Avenue West) பகுதியில் இந்தத் தாக்குதல் இடம்பெற்றுள்ளது.
தூண்டுதல் ஏதுமின்றி நடந்த இந்தத் தாக்குதலில் சிறிய நாய் உயிரிழந்ததுடன், அதன் உரிமையாளர் உயிருக்கு ஆபத்தில்லாத காயங்களுக்கு உள்ளானார்.
தாக்குதலில் ஈடுபட்ட நாய் பழுப்பு நிற ‘பிட்புல்’ (Pit bull) கலப்பினத்தைச் சேர்ந்தது என்றும், அது தற்போது கட்டின்றித் தப்பியோடியுள்ளதாகவும் பொலிஸார் தெரிவித்துள்ளனர்.
கண்காணிப்பு கெமராக்களில் பதிவான நாயின் புகைப்படங்களை வெளியிட்டுள்ள பொலிஸார், அதைக் கண்டுபிடிக்க பொதுமக்களின் உதவியைக் கோரியுள்ளனர்.
குறித்த நாயைக் கண்டால் உடனடியாக 911 என்ற இலக்கத்திற்கு அழைக்குமாறு பொதுமக்கள் அறிவுறுத்தப்பட்டுள்ளனர்.
இந்தச் சம்பவத்தைத் தொடர்ந்து அப்பகுதி மக்களிடையே அச்சம் நிலவுவதால், பொதுப் பாதுகாப்பை உறுதிப்படுத்த மேலதிக நடவடிக்கைகள் எடுக்கப்பட்டு வருகின்றன
