கனடாவின் பல்வேறு மாகாணங்களில் இந்த வாரம் வானிலையில் பாரிய மாற்றங்கள் ஏற்படும் என சுற்றுச்சூழல் கனடா (Environment Canada) எதிர்வு கூறியுள்ளது.
சில பகுதிகளில் வசந்தகால வெப்பம் நிலவினாலும், பல இடங்களில் பனிப்பொழிவு மற்றும் கடும் காற்று வீசக்கூடும் எனத் தெரிவிக்கப்பட்டுள்ளது.
ஒன்டாரியோ மற்றும் கியூபெக் (Ontario & Quebec) மற்றும் தலைநகர் ஒட்டாவா (Ottawa) , டொராண்டோ (GTA) பகுதிகளில் இந்த வாரம் மழை மற்றும் பனித்துளிகள் (Flurries) கலந்த வானிலை காணப்படும்.
செவ்வாய்க்கிழமை இரவு வெப்பநிலை –9°C வரை குறையக்கூடும் என்றாலும், வியாழக்கிழமை 15°C வரை வெப்பம் அதிகரிக்க வாய்ப்புள்ளது.
கியூபெக்கின் (Quebec) கிழக்குப்பகுதிகளில் 20 செ.மீ வரை பனிப்பொழிவு எச்சரிக்கை விடுக்கப்பட்டுள்ளது. மொன்றியலில் (Montreal) மழை, பனி மற்றும் வெயில் என கலவையான வானிலை நிலவும்.
வின்னிபெக் (Winnipeg) மற்றும் ரெஜினா (Regina) பகுதிகளில் இன்னும் குளிர்கால உணர்வே நீடிக்கும்.
இங்கு பனிப்பொழிவு எதிர்பார்க்கப்படுவதுடன், சனிக்கிழமை வெப்பநிலை 11°C முதல் 16°C வரை உயரும்.
எட்மண்டன் (Edmonton) பகுதியிலும் இதே போன்ற குளிர் நிலவும். இருப்பினும், பிரிட்டிஷ் கொலம்பியா (B.C.) மாகாணத்தின் விக்டோரியா (Victoria) மற்றும் வான்கூவர் (Vancouver) பகுதிகளில் இந்த வாரம் முழுவதும் இதமான சூரிய ஒளி மற்றும் 17°C முதல் 20°C வரையிலான வசந்தகால வெப்பம் நிலவும்.
நியூ பிரன்சுவிக் (New Brunswick) மற்றும் நோவா ஸ்கோடியா (Nova Scotia) பகுதிகளில் கடும் காற்று மற்றும் உறைபனி மழை எச்சரிக்கை விடுக்கப்பட்டுள்ளது.
நியூ பவுண்ட்லாந்து மற்றும் லாப்ரடோர் (Newfoundland and Labrador) பகுதிகளில் மணிக்கு 130 கி.மீ வேகத்தில் பலத்த காற்று வீசக்கூடும்.
வடக்குப் பிராந்தியங்களான யெல்லோநைப் (Yellowknife) மற்றும் வைட்ஹார்ஸ் (Whitehorse) பகுதிகளில் அதிகப்படியான குளிர் நிலவும் என்றும் அங்கு இரவு நேர வெப்பநிலை –21°C வரை செல்லக்கூடும் என அறிவிக்கப்பட்டுள்ளது.
