நோவா ஸ்கோடியாவின் கேப் பிரெட்டன் (Cape Breton) பகுதியில் கடந்த மார்ச் 26 முதல் காணாமல் போயுள்ள 30 வயது இளைஞன் கொன்னர் மெக்டொனால்டை (Connor MacDonald) தேடும் பணிகள் முன்னெடுக்கப்பட்டு வருகின்றன.
இந்த பணியில், தன் மகனைப் பறிகொடுத்த தந்தை ஒருவர் இணைந்துள்ளமை பலரையும் நெகிழ்ச்சியடையச் செய்துள்ளது.
சிட்னி (Sydney) நகரைச் சேர்ந்த கென் மெக்டொனால்ட் (Ken MacDonald) என்பவரே, தனது நண்பருடன் இணைந்து மொரிசன் வீதி (Morrison Road) காட்டுப்பகுதிகளில் இந்தத் தேடுதல் வேட்டையை முன்னெடுத்து வருகிறார்.
கென் மெக்டொனால்டின் மகன் ஜஸ்டின் மெக்டொனால்ட் (Justin MacDonald) கடந்த 2024-ல் காணாமல் போய், ஓராண்டிற்குப் பிறகு 2025 மே மாதம் சடலமாக மீட்கப்பட்டார்.
அந்த ஆறாத வடுவோடு, தற்போது காணாமல் போயுள்ள கொன்னரின் குடும்பத்திற்கு உதவ அவர் முன்வந்துள்ளார்.
“இந்தத் துயரத்தை விவரிக்க முடியாது, இது ஒருபோதும் ஆறாத வடு” என அவர் உருக்கமாகத் தெரிவித்துள்ளார்.
வார இறுதியில் பெய்த கடும் பனிப்பொழிவு தேடுதல் பணியைச் சவாலானதாக மாற்றியுள்ளது.
காணாமல் போன கொன்னரின் ட்ரக் வண்டி மொரிசன் வீதியில் கண்டெடுக்கப்பட்டுள்ள நிலையில், பொதுமக்கள் தங்கள் வீடுகளின் கண்காணிப்பு கெமராக்கள் மற்றும் தோப்புப் பகுதிகளைச் சோதிக்குமாறு பொலிஸார் கேட்டுக்கொண்டுள்ளனர்.
இது குறித்த தகவல் தெரிந்தவர்கள் கேப் பிரெட்டன் பிராந்திய பொலிஸ் சேவையை (Cape Breton Regional Police Service) 902-563-5151 என்ற இலக்கத்தில் தொடர்பு கொள்ளுமாறு கோரப்பட்டுள்ளனர்.
