கனடாவில் (Canada) ஒட்டுமொத்த விவாகரத்து விகிதம் கடந்த 50 ஆண்டுகளில் இல்லாத அளவுக்குக் குறைந்துள்ள போதிலும், 50 வயதுக்கு மேற்பட்ட தம்பதியினர் பிரியும் ‘சாம்பல் விவாகரத்து’ (Grey Divorce) கடந்த சில தசாப்தங்களாகத் தொடர்ந்து அதிகரித்து வருகிறது.
மக்களின் சராசரி ஆயுட்காலம் அதிகரித்துள்ளமை, பிள்ளைகள் வளர்ந்து வீட்டை விட்டு வெளியேறுதல், பணி ஓய்வு மற்றும் தங்களது எஞ்சிய வாழ்க்கையை மகிழ்ச்சியாக வாழ வேண்டும் என்ற எண்ணம் போன்றவை இதற்கு முக்கியக் காரணங்களாகச் சுட்டிக்காட்டப்படுகின்றன.
50 வயதிற்குப் பின் பிரிந்த Marnie Wraith என்பவர், வாழ்க்கையில் மேலும் புதிய அனுபவங்களையும் சுய வளர்ச்சியையும் பெறுவதற்காகவே இந்த முடிவை எடுத்ததாகக் கூறியுள்ளார்.
இது குறித்து டொராண்டோவைச் (Toronto) சேர்ந்த குடும்பச் சட்டத்தரணி Jared Grossman மற்றும் சிகிச்சை நிபுணர் Andrew Sofin ஆகியோர் கூறுகையில்; வயது முதிர்ந்த காலத்தில் குடும்பப் பொறுப்புகள் குறையும் போது, மக்கள் தங்களைப் பற்றி அதிகம் சிந்திக்கத் தொடங்குகின்றனர்.
இருப்பினும், நீண்டகாலத் திருமண வாழ்க்கைக்குப் பிறகான பிரிவில் சொத்துப் பங்கீடு, வீட்டுக் கடன் மற்றும் ஜீவனாம்சம் (Spousal Support) வழங்குவதில் பல்வேறு நிதிச் சிக்கல்கள் ஏற்படுகின்றன.
இவ்வாறான பிரிவுக்குப் பின்னர் ஆண்கள் மீண்டும் மறுமணம் செய்ய முற்படும் வேளையில், பெண்கள் மறுமணத்தை விடத் நிதிச் சுதந்திரம், நண்பர்களுடன் இணைந்து பயணிப்பது மற்றும் வாழ்வதையே அதிகம் விரும்புவதாக உளவியல் நிபுணர் Adam Terpstra தெரிவித்துள்ளார்.
