கட்டாரை வீழ்த்தி கனடா வரலாற்று வெற்றி – வீரரின் கடும் காயத்தால் சோகம்!

வான்கூவர் (Vancouver) நகரில் நடைபெற்ற உலகக் கிண்ணக் கால்பந்து போட்டியில், கத்தார் (Qatar) அணிக்கு எதிராக 6-0 என்ற கோல் கணக்கில் கனடா (Canada) வரலாற்றுச் சிறப்புமிக்க தனது முதல் வெற்றியைப் பதிவு செய்துள்ளது.

எனினும், கனடிய நடுகள வீரர் இஸ்மாயில் கோனேவுக்கு (Ismaël Koné) ஏற்பட்ட கொடூரமான கால் காயம் இந்த வெற்றிக் கொண்டாட்டத்தை சோகத்தில் ஆழ்த்தியுள்ளது.

போட்டியின் இரண்டாம் பாதியில், கத்தார் வீரர் அசிம் மடிபோ (Assim Madibo) பின்னால் இருந்து இழைத்த ஆபத்தான தடையினால் (Tackle), 24 வயதான இஸ்மாயில் கோனேவின் (Ismaël Koné) இடது கால் கடுமையாக முறிவடைந்தது.

அவர் உடனடியாக மைதானத்திலிருந்து ஸ்டிரெச்சரில் கொண்டு செல்லப்பட்டு, அறுவை சிகிச்சைக்காக உள்ளூர் மருத்துவமனையில் அனுமதிக்கப்பட்டுள்ளார்.

இந்த விபரீத தடையை ஏற்படுத்திய அசிம் மடிபோவுக்கு (Assim Madibo) சிவப்பு அட்டை (Red Card) காண்பிக்கப்பட்டு மைதானத்திலிருந்து வெளியேற்றப்பட்டார்.

ஏற்கனவே முதல் பாதியில் ஹோமாம் அகமது (Homam Ahmed) வெளியேற்றப்பட்டதால், கத்தார் அணி 9 வீரர்களுடன் விளையாட வேண்டியதாயிற்று.

கனடா அணியின் பயிற்சியாளர் ஜெஸ்ஸி மார்ஷ் (Jesse Marsch) கூறுகையில், எலும்பு உடையும் சத்தம் தங்களுக்குக் கேட்டதாகவும், மடிபோ நேரில் வந்து கோனேவிடம் மன்னிப்பு கேட்டதாகவும் தெரிவித்தார்.

போட்டியில் கனடாவின் நட்சத்திர வீரர் ஜொனாதன் டேவிட் (Jonathan David) 3 கோல்களை (Hat-trick) அடித்தார்.

கோனேவுக்குப் பதிலாக களமிறங்கிய நாதன் சலிபா (Nathan Saliba) கனடாவின் 4-வது கோலை அடித்த பிறகு, கோனேவின் ஜெர்சியை உயர்த்திப் பிடித்து தனது உருக்கமான மரியாதையை வெளிப்படுத்தினார்.

கனடா அணியின் கேப்டன் ஸ்டீபன் யுஸ்டாக்கியோ (Stephen Eustáquio) மற்றும் சக வீரர்கள் அனைவரும் கோனேவின் இந்த நிலை குறித்து மிகுந்த கவலையும், அவரது ஆட்டத்தை அணி நிச்சயம் மிஸ் செய்யும் என்றும் தெரிவித்துள்ளனர்.