Facebook மற்றும் Instagram குழந்தைகளின் மனநலத்திற்கு பாதிப்பை ஏற்படுத்தியதாகக் கண்டறிந்த அமெரிக்காவின் New Mexico நீதிமன்றம், Meta நிறுவனத்திற்கு மேலும் 567 மில்லியன் அமெரிக்க டொலர் செலுத்த உத்தரவிட்டுள்ளது.
இந்தப் பணத்தின் பெரும்பகுதி, இளைஞர்களுக்கான மனநல சிகிச்சைகளுக்கு பயன்படுத்தப்படவுள்ளது. மீதமான தொகை விழிப்புணர்வு, தடுப்பு நடவடிக்கைகள் மற்றும் பரிசோதனைச் சேவைகளுக்காக அடுத்த ஐந்து ஆண்டுகளில் செலவிடப்படும்.
இதற்கு முன்னர் மார்ச் மாதத்தில், Facebook மற்றும் Instagram குழந்தைகளுக்கு பாதுகாப்பானவை என பொதுமக்களை தவறாக வழிநடத்தியதாகக் கண்டறிந்த நீதிமன்றம், Meta-வுக்கு 375 மில்லியன் டொலர் அபராதம் விதித்திருந்தது.
இதன்படி, இந்த ஒரே New Mexico வழக்கில் Meta எதிர்கொள்ளும் மொத்தத் தொகை 942 மில்லியன் டொலராக உயர்ந்துள்ளது.
பணம் செலுத்துவதுடன் மட்டும் இந்தத் தீர்ப்பு முடிவடையவில்லை.
இளம் பயனர்களின் Facebook மற்றும் Instagram பயன்பாட்டுக்கு மாதாந்த வரம்புகள், notification கட்டுப்பாடுகள், பெரியவர்கள் சிறுவர்களைத் தொடர்புகொள்வதில் கடுமையான பாதுகாப்பு, AI chatbot-களுக்கான புதிய கட்டுப்பாடுகள் மற்றும் குழந்தைகள் மீதான பாலியல் துஷ்பிரயோக புகார்களை மேலும் தீவிரமாக ஆய்வு செய்வது உள்ளிட்ட மாற்றங்களையும் நீதிமன்றம் உத்தரவிட்டுள்ளது. இந்த உத்தரவுகள் ஐந்து ஆண்டுகள் அமலில் இருக்கும்.
ஆனால் இந்தத் தீர்ப்பை ஏற்காத Meta, மேல்முறையீடு செய்யப்போவதாக அறிவித்துள்ளது. இளம் பயனர்களைப் பாதுகாக்க ஏற்கனவே பல நடவடிக்கைகளை மேற்கொண்டுள்ளதாகவும் நிறுவனம் கூறுகிறது.
