ஸ்கார்பரோ (Scarborough) பகுதியில், டர்ஹாம் போக்குவரத்து (Durham Transit) பேருந்து ஒன்றில் பயணித்த முஸ்லிம் பெண்மணி ஒருவர் மீது, மர்ம நபர் ஒருவர் வாய்மொழியாகவும் உடல்ரீதியாகவும் தாக்குதல் நடத்தியுள்ளார்.
இது தொடர்பான காணொளி சமூக ஊடகங்களில் பரவியதையடுத்து, டொராண்டோ பொலிஸ் சேவையின் வெறுக்கத்தக்க குற்றங்கள் பிரிவு (Hate Crime Unit) இந்தச் சம்பவத்தைக் குறித்து விசாரணையைத் தொடங்கியுள்ளது.
டர்ஹாம் போக்குவரத்தின் பேருந்து ஸ்கார்பரோவில் பயணித்தபோது, சம்பந்தப்பட்ட நபர் அந்தப் பெண்ணை நோக்கி இனவெறி மற்றும் மத ரீதியான வெறுப்புச் சொற்களைப் பயன்படுத்தியுள்ளார்.
காணொளியில், அந்த நபர் பெண்ணை “பயங்கரவாதி” (Terror) என்று அழைத்து, அவரை நோக்கித் தள்ளி உதைக்கும் காட்சியும் பதிவாகியுள்ளது.
இந்தத் தாக்குதலை மற்றொரு ஹிஜாப் அணிந்த பெண் பயணி தடுத்து நிறுத்தியுள்ளார்.
பாதிக்கப்பட்ட பெண்ணுடன் தாங்கள் தொடர்பில் இருப்பதாக தேசிய கனடிய முஸ்லிம்கள் சபை (NCCM) தெரிவித்துள்ளது.
இந்தச் சம்பவம் குறித்துத் தீவிர விசாரணை நடைபெற்று வருவதாகத் தெரிவித்துள்ள பொலிஸார், பொது இடங்களில் நடைபெறும் இத்தகைய வெறுக்கத்தக்கச் செயல்களைச் சகித்துக்கொள்ள முடியாது என்று வலியுறுத்தியுள்ளனர்.
