றொரண்டோ Toronto நகரில் உள்ள The Village of Humber Heights ஓய்வு இல்லத்தில் வாழும் Marie Rosa (மேரி ரோசா), கனடாவின் மிக வயதான வாழும் நபராக (Canada’s oldest living person) அதிகாரப்பூர்வமாகக் கௌரவிக்கப்பட்டுக் கொண்டாடப்பட்டுள்ளார்.
1915-ஆம் ஆண்டு செப்டம்பர் 17-இல் பிறந்த Marie Rosa, முதலாம் உலகப்போர், இரண்டாம் உலகப்போர் மற்றும் Great Depression (பெரும் பொருளாதார வீழ்ச்சி) போன்ற பல வரலாற்றுச் சவால்களைக் கடந்து வாழ்ந்துள்ளார்.
அண்மையில் 103 வயதில் காலமான தனது சகோதரி Virginia Del Brocco (வர்ஜீனியா டெல் புரோக்கோ) உட்பட பலரின் இழப்புகளைச் சந்தித்தபோதிலும், வாழ்க்கையை நேர்மறை எண்ணத்தோடு அணுகுகிறார்.
இவரின் நீண்ட ஆயுளுக்கான ரகசியம் குறித்து அவரது மகள் Cathie Sinisalo (கேத்தி சினிக்சாலோ) கூறுகையில், “எல்லோரையும் நேசியுங்கள்; ஒவ்வொரு மனிதரும் மதிப்புமிக்கவர்களே. நீங்கள் அன்பைக் கொடுத்தால், அன்பே உங்களுக்குத் திரும்பக் கிடைக்கும்” என்பதே Marie Rosa-வின் முக்கிய வாழ்க்கை மந்திரம் எனக் குறிப்பிட்டுள்ளார்.
எதையும் வீணடிக்காத சிக்கனமான வாழ்வியல் முறை, குடும்பத்தின் மீதான அளவற்ற அன்பு, ஆடை வடிவமைப்பு மற்றும் வாகனம் ஓட்டுவதில் இருந்த விருப்பமே இவரை இத்தனை ஆண்டுகள் உற்சாகத்துடன் வாழ வைத்துள்ளன.
