கனடாவில் சக மலையேற்ற வீராங்கனையை காப்பாற்ற முயன்ற சீன வீரர் பலி – குடும்பத்திற்கு குவிந்த மருத்துவக் கட்டணங்கள்!

கனடாவின் மெட்ரோ வான்கூவர் (Metro Vancouver) பகுதியில் உள்ள பிரன்சுவிக் (Brunswick Mountain) மலையில், சக மலையேற்ற வீராங்கனை ஒருவரைக் காப்பாற்ற முயன்ற சீனச் சுற்றுலாப் பயணி யான் சென் (Yan Cen) என்பவர் உயிரிழந்துள்ளார்.

கடந்த சனிக்கிழமை, 14 பேர் கொண்ட குழுவினருடன் மலையேற்றத்தில் ஈடுபட்டிருந்த போது, ஒரு பெண் தவறி விழுந்ததைக் கண்டு அவருக்கு உதவ முயன்ற யான் சென், தானும் நிலைதடுமாறி சுமார் 100 மீற்றர் பள்ளத்தில் விழுந்துள்ளார்.

ஹெலிகாப்டர்கள் மற்றும் கயிறு மூலமான சிக்கலான மீட்பு நடவடிக்கைகளுக்குப் பிறகு அவர் மீட்கப்பட்டு வான்கூவர் பொது மருத்துவமனையில் (Vancouver General Hospital) அனுமதிக்கப்பட்டார்.

எனினும், சிகிச்சை பலனின்றி அடுத்த நாள் அவர் உயிரிழந்தார். அவர் ஒரு சுற்றுலாப் பயணி என்பதால், அவரது குடும்பத்தினர் தற்போது ஒரு நாளாந்தம் சுமார் 18,105 டொலர்கள் என்ற அளவிலான மிக அதிகப்படியான அவசர சிகிச்சைப் பிரிவு (ICU) மருத்துவக் கட்டணங்களை எதிர்நோக்கியுள்ளனர்.

யான் சென்னின் உடல்நிலை மற்றும் இறுதிச் சடங்குச் செலவுகளுக்காக பசிபிக் நார்த்வெஸ்ட் அவுட்டோர் அசோசியேஷன் (Pacific Northwest Outdoor Association) என்ற அமைப்பு நிதி சேகரிப்பில் ஈடுபட்டுள்ளது.

செவ்வாய்க்கிழமை மாலை வரை சுமார் 44,000 டொலர்கள் நிதி திரட்டப்பட்டுள்ளது.

காயமடைந்த பெண் பயணி தற்போது சீரான நிலையில் இருப்பதாக லயன்ஸ் பே தேடல் மற்றும் மீட்புக்குழு (Lions Bay Search and Rescue) தெரிவித்துள்ளது.