றொரண்டோவின் எட்டோபிகோ கடற்கரை ஓரத்தில் அமைந்துள்ள புகழ்பெற்ற ஹம்பர் யாட் கிளப் கட்டிடத்தில் புதன்கிழமை அதிகாலை ஏற்பட்ட பயங்கரத் தீ விபத்தால் அக்கட்டிடம் பலத்த சேதமடைந்துள்ளது.
அதிகாலை 4:47 மணியளவில் 101 Humber Valley Road இல் உள்ள வணிகக் கட்டிடத்தில் தீ விபத்து ஏற்பட்டுள்ளதாகத் தீயணைப்புப் படையினருக்குத் தகவல் கிடைத்தது.
தீயணைப்பு வீரர்கள் சம்பவ இடத்திற்கு விரைந்தபோது, தீ கட்டிடத்தின் கூரை வழியாகக் கொழுந்துவிட்டு எரிந்துகொண்டிருந்தது.
நிலைமையின் தீவிரத்தைக் கருதி இது மூன்றாம் நிலை தீ விபத்தாக (Three-alarm fire) அறிவிக்கப்பட்டது.
சுமார் 27 தீயணைப்பு வாகனங்களும், 100-க்கும் மேற்பட்ட தீயணைப்பு வீரர்களும் இணைந்து பல மணிநேரம் போராடித் தீயைக் கட்டுப்பாட்டுக்குள் கொண்டு வந்தனர்.
அதிர்ஷ்டவசமாக இந்த விபத்தில் எவருக்கும் காயம் ஏற்படவில்லை எனவும், கட்டிடத்திற்குள் யாரும் சிக்கியிருக்கவில்லை எனவும் உறுதி செய்யப்பட்டுள்ளது.
தீ விபத்துக்கான காரணம் இன்னும் கண்டறியப்படவில்லை. இது குறித்து ஒன்ராறியோ தீயணைப்பு மார்ஷல் (Ontario Fire Marshal) அலுவலகத்திற்கு அறிவிக்கப்பட்டுள்ளதோடு, மேலதிக விசாரணைகள் முன்னெடுக்கப்பட்டு வருகின்றன.
தீயணைப்பு வீரர்களின் துரித நடவடிக்கையால் தீ அருகில் உள்ள ஏனைய பகுதிகளுக்குப் பரவாமல் தடுக்கப்பட்டது.
