மிசிசாகாவின் கிளென் எரின் டிரைவ் (Glen Erin Drive) மற்றும் அக்விடெய்ன் அவென்யூ (Aquitaine Avenue) சந்திப்பில், கடந்த சனிக்கிழமை அதிகாலை 1:40 மணியளவில் இரண்டு வாகனங்கள் நேருக்குநேர் மோதி விபத்துக்குள்ளாகின.
சிவப்பு நிற போர்டு எக்ஸ்ப்ளோரர் (Ford Explorer) SUV மற்றும் கருப்பு நிற வோக்ஸ்வேகன் (Volkswagen) செடான் ஆகிய வாகனங்கள் மோதிக்கொண்டதில், அதில் பயணித்த நால்வர் காயமடைந்தனர்.
பாதிக்கப்பட்ட நால்வரும் உடனடியாக மருத்துவமனைக்குக் கொண்டு செல்லப்பட்டனர்.
அவர்களில் இருவர் ஆரம்பத்தில் கவலைக்கிடமான நிலையில் இருந்ததாகத் தெரிவிக்கப்பட்டது.
தற்போது நால்வரின் காயங்களும் உயிருக்கு ஆபத்தற்றவை என உறுதிப்படுத்தப்பட்டுள்ளது.
இந்த விபத்து தொடர்பாக, வோக்ஸ்வேகன் வாகனத்தைச் செலுத்திய பெண் சாரதி ஒருவரை பொலிஸார் கைது செய்துள்ளனர்.
அவர் மீது மது அல்லது போதைப்பொருள் உட்கொண்டு வாகனம் செலுத்தியமை (Impaired operation) தொடர்பான குற்றச்சாட்டுகள் சுமத்தப்பட்டுள்ளன.
விபத்து நடந்த பகுதியில் போக்குவரத்து தற்காலிகமாக நிறுத்தப்பட்டிருந்த நிலையில், சனிக்கிழமை காலை 8 மணி அளவில் சாலைகள் மீண்டும் திறக்கப்பட்டன.
இச்சம்பவம் குறித்த மேலதிக விசாரணைகளை பீல் பிராந்திய பொலிஸார் (Peel Police) மேற்கொண்டு வருகின்றனர்.
