கடந்த மாதம் ஜி.டி.ஏ (GTA) பகுதியில் தற்காலிக எச்.எஸ்.டி (HST) வரித்தள்ளுபடி திட்டம் அறிமுகப்படுத்தப்பட்டதை அடுத்து, புதிய வீடுகளின் விற்பனை அதிகரித்துள்ளதாக ‘பில்ட்’ (BILD) அமைப்பின் புதிய அறிக்கை தெரிவிக்கிறது.
எனினும், இத்திட்டம் எவ்வாறு நடைமுறைப்படுத்தப்படும் என்ற தெளிவுக்காக வாங்குபவர்கள் காத்திருப்பதால், விற்பனை வளர்ச்சி சற்றே சீரடைந்துள்ளது.
கடந்த மே மாதத்தில் மொத்தம் 1,023 புதிய வீடுகள் விற்பனையாகியுள்ளன. இது கடந்த ஆண்டின் மிகக் குறைந்த சாதனை அளவான 310 உடன் ஒப்பிடுகையில் மூன்று மடங்கு அதிகமாகும்.
இதில் 830 தனிக்குடும்ப வீடுகள் (Single-family homes) விற்பனையாகியுள்ள வேளையில், காண்டோமினியம் (Condominium) சந்தை தொடர்ந்து சரிவைச் சந்தித்து, வெறும் 193 அலகுகள் மட்டுமே விற்பனையாகியுள்ளன.
இந்த எச்.எஸ்.டி வரித்தள்ளுபடி திட்டத்தின் கீழ் புதிய வீடு வாங்குபவர்களுக்கு $130,000 வரை தள்ளுபடி வழங்கப்படுகிறது.
ஆனால், இதற்கான காலக்கெடு நிபந்தனைகள் மிகவும் இறுக்கமாக இருப்பதால், அடுக்குமாடி காண்டோ திட்டங்களுக்கு இது ஒத்துவரவில்லை என பில்ட் (BILD) அமைப்பின் முதன்மை செயல்பாட்டு அதிகாரி ஜஸ்டின் ஷெர்வுட் (Justin Sherwood) தெரிவித்துள்ளார்.
மே மாத நிலவரப்படி புதிய காண்டோ ஒன்றின் சராசரி விலை $1,029,489 ஆகவும், தனிக்குடும்ப வீட்டின் விலை $1,427,543 ஆகவும் பதிவாகியுள்ளது.
