உணவகத்திற்கு எதிராக ‘போலி பிரச்சாரம்’  ஒன்றிணைந்து பதிலடி கொடுத்த மக்கள்!

ஒன்டாரியோவின் லண்டன் (London, Ont.) மாநகரில் உள்ள பய்ரன் (Byron) பகுதியில், கடந்த ஆறு ஆண்டுகளாகச் இயங்கி வரும் லியோஸ் பீட்சா (Leo’s Pizza) உணவகத்தின் நற்பெயரைக் கெடுக்கும் நோக்கில் திட்டமிட்ட “விமர்சனத் தாக்குதல்” (Review bombing) நடத்தப்பட்டுள்ளது.

ஒரே நாளில் ஒன்பதுக்கும் மேற்பட்ட ஒரு நட்சத்திர (One-star) போலி விமர்சனங்கள் பதிவிடப்பட்டதைக் கண்டு அதன் உரிமையாளர் டேமன் அடேயி (Damon Ataei) அதிர்ச்சியடைந்தார்.

இந்தத் தாக்குதலைச் சமாளிக்க அவர் கூகுள் (Google) நிறுவனத்தின் உதவியை நாடியபோதும், தானியங்கி பதில்கள் மட்டுமே கிடைத்ததால் ஏமாற்றமடைந்தார்.

இதனையடுத்து, அவர் ‘பய்ரன் நெய்பர்ஸ்’ (Byron Neighbours) முகநூல் பக்கத்தில் தனது குமுறலைப் பதிவிட்டார்.

இதைப் பார்த்த அந்தப் பகுதி மக்கள், உடனடியாகத் திரண்டு லியோஸ் பீட்சாவிற்கு ஆதரவாக 150-க்கும் மேற்பட்ட ஐந்து நட்சத்திர (Five-star) விமர்சனங்களை வாரி வழங்கினர்.

மக்களின் இந்த அதிரடி ஆதரவால், அந்த உணவகத்தின் மதிப்பீடு மீண்டும் 4.8 ஆக உயர்ந்தது.

“பய்ரன் மக்கள் காட்டிய இந்த அன்பு நெகிழ்ச்சியளிக்கிறது” என அடேயி நெகிழ்ச்சியுடன் தெரிவித்தார்.

பல ஆண்டுகளாகப் போராடிப் பெற்ற நற்பெயரைச் சில நிமிடங்களில் சிதைக்க முயன்றவர்களுக்கு, ஒரு சமூகமாக ஒன்றிணைந்து மக்கள் கொடுத்த இந்தப் பதிலடி தற்போது பேசுபொருளாகியுள்ளது.