கனடாவின் அஜாக்ஸ் (Ajax) பகுதியில், போதையில் பாடசாலைப் பேருந்து ஒன்றை ஓட்டிச் சென்று மெக்டொனால்ட்ஸ் (McDonald’s) உணவகத்தின் வாகனச் சேவைப் பாதையில் (Drive-thru) மோதிய 38 வயது நபர் ஒருவர் கைது செய்யப்பட்டுள்ளார்.
மே 11 ஆம் திகதி இரவு 11:30 மணியளவில் டான்டன் வீதி மேற்கு (Taunton Road West) மற்றும் வெஸ்ட்னி வீதி வடக்கு (Westney Road North) பகுதியில் இந்த விபத்து நிகழ்ந்துள்ளது.
திருடப்பட்ட சிறிய ரகப் பாடசாலைப் பேருந்து ஒன்றை தாறுமாறாக ஓட்டிச் சென்ற நபர், மெக்டொனால்ட்ஸ் உணவகத்தின் வாகனச் சேவைப் பகுதிக்குள் நுழைய முயன்றபோது அங்கிருந்த தடுப்புச் சுவரில் மோதியுள்ளார்.
சம்பவ இடத்திற்கு விரைந்த டர்ஹாம் பொலிஸார் (Durham police), பேருந்தை நிறுத்தி ஓட்டுநரைக் கைது செய்தனர். விசாரணையில் அவர் போதையில் இருந்தது உறுதி செய்யப்பட்டது.
குறித்த நபர் நோர்த் யோர்க் (North York) பகுதியில் உள்ள பேருந்து நிறுத்துமிடம் ஒன்றில் புகுந்து, அங்கிருந்த பிற வாகனங்களையும் சேதப்படுத்திவிட்டு இந்தப் பேருந்தைத் திருடிச் சென்றதாகப் பொலிஸார் தெரிவித்துள்ளனர்.
டானர் ஜோன் டேவிஸ் (Tanner Jon Davis) என அடையாளம் காணப்பட்ட அந்த நபர் மீது, போதையில் வாகனம் செலுத்தியமை, திருடப்பட்ட சொத்துக்களை வைத்திருந்தமை, பொலிஸாரின் விசாரணைக்கு இடையூறு விளைவித்தமை உள்ளிட்ட பல குற்றச்சாட்டுகள் சுமத்தப்பட்டுள்ளன.
கைது செய்யப்பட்ட நபர் பொலிஸாரிடம் தனது பெயரை மாற்றிக் கூறி ஏமாற்ற முயன்றதும் விசாரணையில் தெரியவந்துள்ளது.
