கனடாவின் Toronto நகரில் உள்ள Etobicoke பகுதியில் அமைந்துள்ள தனியார் கழிவு செயலாக்க நிலையத்தில் செவ்வாய்க்கிழமை அதிகாலை பாரிய தீ விபத்து ஏற்பட்டது.
156 Disco Road இல் அமைந்துள்ள ‘YORK1 Disco Transfer Station’ கட்டிடத்தினுள் அதிகாலை 3:58 மணியளவில் இத்தீ விபத்து ஏற்பட்டுள்ளது.
இதில் கட்டுமானப் பொருட்களும் இன்சுலேஷன் (insulation) பொருட்களும் தீப்பற்றி எரிந்ததாக Toronto Fire Services Commander John Carson தெரிவித்துள்ளார்.
கட்டிடத்தின் அமைப்பு பலவீனமடையும் அபாயம் ஏற்பட்டதால், தீயணைப்பு வீரர்கள் கட்டிடத்தின் வெளியிலிருந்தே தீயை அணைக்கும் நடவடிக்கையில் ஈடுபட்டனர்.
100க்கும் மேற்பட்ட தீயணைப்பு வீரர்கள் களமிறக்கப்பட்டு தீ தற்போது கட்டுப்பாட்டுக்குள் கொண்டுவரப்பட்டுள்ளது.
இச்சம்பவத்தில் எவருக்கும் காயங்கள் ஏற்படவில்லை.
இந்த விபத்தினால் Hwy. 427 பகுதியில் அடர்ந்த புகை பரவியதால் போக்குவரத்து பாதிப்பு ஏற்பட்டதுடன், Disco Road மற்றும் Attwell Drive ஆகிய வீதிகள் தற்காலிகமாக மூடப்பட்டன.
கடந்த Oct. 23, 2025 அன்றும் இதே Disco Road பகுதியில் உள்ள கழிவு நிலையத்தில் 3-alarm தீ விபத்து ஒன்று இடம்பெற்றிருந்தமை குறிப்பிடத்தக்கது.
