கனடா தோல்வியடைந்தும் உலகக்கிண்ண நாக் – அவுட் சுற்றுக்கு தகுதி!

FIFA உலகக்கிண்ண காற்பந்து தொடரின் குழுநிலையின் இறுதிப் போட்டியில், சுவிட்சர்லாந்து (Switzerland) அணியிடம் 2-1 என்ற கோல் கணக்கில் கனடா (Canada) தோல்வியடைந்துள்ளது.

எனினும், குழு ‘B’ இல் இரண்டாம் இடத்தைப்பிடித்து கனடா அடுத்த நாக்-அவுட் சுற்றுக்கு முன்னேறியுள்ளது. இப்போட்டியில் வெற்றிபெற்ற சுவிட்சர்லாந்து குழுவில் முதலிடத்தைப் பெற்றுக்கொண்டது.

பரபரப்பாக நடைபெற்ற இப்போட்டியின் 46வது நிமிடத்தில் சுவிட்சர்லாந்தின் ரூபன் வர்காஸ் (Ruben Vargas) முதல் கோலையும், 57வது நிமிடத்தில் ஜோஹன் மன்சாம்பி (Johan Manzambi) இரண்டாவது கோலையும் அடித்தனர்.

தொடர்ந்து அதிரடியாக விளையாடிய கனடா அணியின் மாற்று வீரர் புரோமிஸ் டேவிட் (Promise David), 76வது நிமிடத்தில் அணியின் ஒரேயொரு கோலை அடித்தார்.

முன்னதாக கத்தார் (Qatar) அணியுடனான போட்டியில் காலில் பலத்த காயமடைந்த கனடாவின் முக்கிய நடுகள வீரர் இஸ்மாயில் கோனே (Ismaël Koné), சக்கர நாற்காலியில் அமர்ந்து மைதானத்திற்கு வந்து ரசிகர்களின் பலத்த வரவேற்பைப் பெற்றார்.

அடுத்ததாக, வரும் ஞாயிற்றுக்கிழமை லொஸ் ஏஞ்சல்ஸ் (Los Angeles) நகரில் நடைபெறவுள்ள நாக்-அவுட் சுற்றில், குழு ‘A’ இன் இரண்டாம் இடத்தைப் பிடித்த அணியுடன் கனடா மோதவுள்ளது.

அதேவேளை, சுவிட்சர்லாந்து ஜூலை 2ஆம் திகதி வான்கூவர் (Vancouver) நகரில் நடைபெறவுள்ள போட்டியில் விளையாடவுள்ளது.