கனடாவின் ப்ராம்ப்டன் (Brampton) பகுதியில் உள்ள வாகன பழுதுபார்க்கும் நிலையம் ஒன்றில், வாகனத்தின் அடியில் சிக்குண்டு ‘டோ ட்ரக்’ (Tow Truck) ஓட்டுநர் ஒருவர் பரிதாபமாக உயிரிழந்துள்ளார்.
வெள்ளிக்கிழமை மாலை 6:30 மணியளவில் ஸ்டீல்ஸ் அவென்யூ ஈஸ்ட் (Steeles Avenue East) மற்றும் டொம்கென் வீதி (Tomken Road) சந்திப்பிற்கு அருகிலுள்ள 277 அட்வான்ஸ் பொலிவார்ட் (Advance Boulevard) பகுதியில் இந்த விபத்து நிகழ்ந்துள்ளது.
பாதிக்கப்பட்ட ஓட்டுநர் தனது ‘டோ ட்ரக்’கில் இருந்து வாகனம் ஒன்றை விடுவித்துக் கொண்டிருந்த (Unhooking) போது, எதிர்பாராதவிதமாக அந்த வாகனம் அவர் மீது ஏறியதில் அவர் வாகனத்தின் அடியில் சிக்குண்டுள்ளார்.
சம்பவ இடத்திற்கு விரைந்த அவசரக்காலப் பணியாளர்கள் அவருக்கு முதலுதவி வழங்கி காப்பாற்ற முயன்ற போதிலும், அவர் சம்பவ இடத்திலேயே உயிரிழந்துவிட்டதாக பொலிஸ் தரப்பு தெரிவித்துள்ளது.
உயிரிழந்த நபரின் விபரங்கள் இன்னும் வெளியிடப்படவில்லை.
இச்சம்பவத்தில் குற்றவியல் பின்னணி எதுவும் இருப்பதாகத் தெரியவில்லை என பீல் பொலிஸ் அதிகாரி டெய்லர் ஹாப்பியார்ட் (Taylor Halfyard) தெரிவித்துள்ளார்.
இது ஒரு வேலைத் தள விபத்து என்பதால், இது தொடர்பான முழுமையான விசாரணைகளைத் தொழிலாளர் அமைச்சகம் (Ministry of Labour) பொறுப்பேற்று முன்னெடுத்து வருகின்றது.
