பிராம்ப்டன் (Brampton) நகரின் பிராமலே (Bramalea) பகுதியில் கடந்த திங்கட்கிழமை (ஏப்ரல் 6) இடம்பெற்ற வன்முறையான கார் கடத்தல் முயற்சியில் இருவர் துப்பாக்கிச் சூட்டிற்கு இலக்காகியுள்ளனர்.
சென்ட்ரல் பார்க் டிரைவ் (Central Park Drive) மற்றும் கிளென்வேல் பொலிவார்ட் (Glenvale Boulevard) சந்திப்பிற்கு அருகில் இந்தச் சம்பவம் இடம்பெற்றுள்ளது.
20 வயது மதிக்கத்தக்க இரு இளைஞர்கள் பயணித்த காரை இரு சந்தேக நபர்கள் வழிமறித்துக் கடத்த முயன்றபோது, பாதிக்கப்பட்டவர்கள் காரை வேகமாகச் செலுத்தித் தப்பிக்க முயன்றுள்ளனர்.
இதன்போது சந்தேக நபர்கள் நடத்திய துப்பாக்கிச் சூட்டில் இருவரும் காயமடைந்தனர்.
ஒருவரது நிலைமை கவலைக்கிடமாக உள்ளதாகப் பொலிஸார் தெரிவித்துள்ளனர்.
சம்பவ இடத்திலிருந்து தப்பியோட முயன்ற 19 வயதான நேசியன் ஒகோகோ (Naesean Okoko) என்ற இளைஞனைப் பீல் பிராந்திய பொலிஸார் (Peel Police) விரட்டிப் பிடித்துக் கைது செய்தனர்.
அவரிடமிருந்து தானியங்கி முறையில் இயங்கக்கூடிய சட்டவிரோதத் துப்பாக்கி மற்றும் போதைப்பொருட்கள் மீட்கப்பட்டுள்ளன.
அவர் மீது கொலை முயற்சி உள்ளிட்ட பல தீவிர குற்றச்சாட்டுகள் சுமத்தப்பட்டுள்ளன.
தலைமறைவாக உள்ள இரண்டாவது சந்தேக நபரைத் தேடும் பணிகள் தீவிரமாக நடைபெற்று வருகின்றன.
