உலகளாவிய பொருளாதார நிச்சயமற்ற நிலைகளுக்கு மத்தியில், கனடா வங்கி (Bank of Canada) தனது முக்கிய வட்டி விகிதத்தில் (Benchmark Interest Rate) எவ்வித மாற்றமும் செய்யாமல் அப்படியே தக்கவைத்துள்ளது.
இதன்படி, வட்டி விகிதம் தொடர்ந்து 5ஆவது முறையாகவும் 2.25 சதவீதமாகவே (2.25 per cent) நீடிக்கும் என அறிவிக்கப்பட்டுள்ளது.
இந்த ஆண்டின் முதல் காலாண்டில் நாட்டின் பொருளாதாரம் எதிர்பார்த்ததை விட மந்தமாக உள்ளது.
இருந்தபோதிலும், உலக சந்தையில் கச்சா எண்ணெய் விலைகள் உயர்ந்துள்ளதால் அடுத்த சில மாதங்களுக்கு பணவீக்கம் 3 சதவீதத்திற்கு அருகிலேயே நீடிக்கலாம் என வங்கியின் ஆளுநர் டிப் மேக்லெம் (Tiff Macklem) தெரிவித்துள்ளார்.
உயர்ந்து வரும் பணவீக்கத்தையும், பலவீனமடைந்து வரும் பொருளாதாரத்தையும் ஒரே நேரத்தில் கையாள்வது கடினம் என்பதால், இந்த வட்டி விகித நிலைநிறுத்தம் தற்போதைய அபாயங்களைச் சமநிலைப்படுத்தும் என அவர் விளக்கமளித்துள்ளார்.
ஈரான் (Iran) மீதான போர் மற்றும் அமெரிக்க (U.S.) வர்த்தகக் கொள்கைகள் காரணமாக உலகளவில் பெரும் நிச்சயமற்ற சூழல் நிலவுகிறது.
எனினும் தற்காலிகமாக உயரும் விலைவாசி அழுத்தங்களைத் தடுக்க வங்கி தொடர்ந்து தீவிரமாகச் செயல்படும் என்றும் அவர் மேலும் குறிப்பிட்டுள்ளார்.