மிசிசாகா (Mississauga) பகுதியில் உள்ள அடுக்குமாடி குடியிருப்புகளின் நிலத்தடி வாகன நிறுத்துமிடங்களில் தொடர்ச்சியாக கார்களைத் திருடி வந்த கும்பலைச் சேர்ந்த 21 வயதுடைய பிரின்ஸ் (Prince) என்ற இளைஞரை பீல் பிராந்திய பொலிஸார் (Peel Police) கைது செய்துள்ளனர்.
அத்துடன், இந்த திருட்டுச் சம்பவங்களுடன் தொடர்புடைய குர்ஜித் சிங் விர்க் (Gurjeet Singh Virk – 23) என்ற மற்றுமொரு இளைஞரை பொலிஸார் தீவிரமாகத் தேடி வருகின்றனர்.
கடந்த மே மாதம் முதல் ஹுரொன்டாரியோ வீதி (Hurontario Street) மற்றும் பர்னம்தோர்ப் வீதி கிழக்கு (Burnamthorpe Road East) ஆகிய பகுதிகளில் வாகனத் திருட்டுகள் அதிகரித்து காணப்பட்டன.
இந்நிலையில், பொலிஸார் தீவிர கண்காணிப்பு கேமரா மற்றும் நவீன தொழில்நுட்பங்களின் உதவியுடன் இந்த இரு சந்தேகநபர்களையும் அடையாளம் கண்டனர்.
இதனைத் தொடர்ந்து, மிசிசாகா (Mississauga) மற்றும் எரின் (Erin) பகுதிகளில் உள்ள இவர்களின் வீடுகளில் நடத்தப்பட்ட சோதனையில், திருடப்பட்ட வாகன ஆவணங்கள், பல கைத்தொலைபேசிகள், கார் சாவிகள் (Key fobs), சாவிகளை புரோகிராம் செய்யும் கருவிகள் மற்றும் 1,465 டொலர் பணம் என்பன பறிமுதல் செய்யப்பட்டன.
கைது செய்யப்பட்டுள்ள பிரின்ஸ் மீது வாகனத் திருட்டு மற்றும் பொதுச் சொத்துக்களுக்கு சேதம் விளைவித்தல் உள்ளிட்ட பல குற்றச்சாட்டுகள் சுமத்தப்பட்டு, பிராம்ப்டன் (Brampton) நீதிமன்றத்தில் ஆஜர்படுத்தப்பட்டுள்ளார்.
இந்த வாகனத் திருட்டு கும்பல் குறித்து பொலிஸார் மேலதிக விசாரணைகளை மேற்கொண்டு வருகின்றனர்.
