ஒன்றாரியோ (Ontario) மாகாணத்தின் எதிர்கால தொழிலாளர் சந்தை தேவைகளை பூர்த்தி செய்ய, அடுத்த பத்து ஆண்டுகளில் (2026 – 2035) 10 லட்சத்திற்கும் அதிகமான பல்கலைக்கழக பட்டதாரிகள் தேவைப்படுவதாக புதிய ஆய்வு அறிக்கை ஒன்று கணித்துள்ளது.
Council of Ontario Universities அமைப்பிற்காக Stokes Economics நிறுவனம் இந்த ஆய்வை மேற்கொண்டுள்ளது.
மாகாணத்தின் பொருளாதார வளர்ச்சியை தக்கவைக்க ஆண்டுக்கு சராசரியாக 100,500 பட்டதாரிகள் தேவை என இந்த அறிக்கை குறிப்பிடுகிறது.
STEM (அறிவியல், தொழில்நுட்பம், பொறியியல், கணிதம்) மற்றும் ஏஐ (AI) தொழில்நுட்ப புரட்சி மற்றும் சைபர் பாதுகாப்பு போன்ற துறைகளை வழிநடத்த சுமார் 212,980 பட்டதாரிகள் தேவைப்படுகிறார்கள்.
முதியோர் மக்கள் தொகை அதிகரிப்பு மற்றும் மருத்துவ கண்டுபிடிப்புகளுக்காக சுமார் 149,000 ஊழியர்கள் தேவைப்படுகிறார்கள்.
வணிகம் மற்றும் நிதித்துறைகளில் நிர்வாக பணிகளுக்காக 195,316 பட்டதாரிகள் தேவைப்படுகிறார்கள்.
University of Toronto பேராசிரியரான Glen Jones கருத்துத் தெரிவிக்கையில், எதிர்காலத்தில் உயர்கல்விக்கான தேவை வலுவாக இருக்கும் என்பதை இது காட்டுவதாக கூறியுள்ளார்.
எனினும் மாறிவரும் குடிவரவுக் கொள்கைகள் மற்றும் பொருளாதார ஸ்திரமற்ற தன்மை போன்ற சவால்களும் இதில் உள்ளதாகவும் அவர் குறிப்பிட்டுள்ளார்.
மாகாண அரசு இதற்காக 6.4 பில்லியன் டாலர் நிதியுதவியை அறிவித்துள்ள போதிலும், பல்கலைக்கழகங்களின் தேவையை பூர்த்தி செய்ய இது போதாது என OCUFA அமைப்பின் தலைவர் Rob Kristofferson தெரிவித்துள்ளார்.
மேலும், மாணவர்களுக்கான OSAP நிதியுதவி குறைப்பு, அவர்களை அதிக கடனாளியாக்கும் என்றும் அவர் சுட்டிக்காட்டியுள்ளார்.
