கனடாவின் ஒன்ராறியோ (Ontario) மாகாணத்தில் எதிர்வரும் ஜூலை 1 ஆம் திகதி முதல் வாகனக் காப்பீட்டு (Auto Insurance) பலன்களில் பெரிய மாற்றங்கள் நடைமுறைக்கு வரவுள்ளன. இதனால் காப்பீட்டு பாலிசிகளை புதுப்பிக்கும் வாகன சாரதிகள் புதிய முடிவுகளை எடுக்க வேண்டிய கட்டாயத்திற்கு ஆளாகியுள்ளனர்.
தற்போது ஒன்ராறியோ ஓட்டுநர்களின் காப்பீட்டுத் திட்டங்களில் 12 கட்டாயப் பலன்கள் (Mandatory Benefits) சேர்க்கப்பட்டுள்ளன.
ஆனால், இந்த புதிய மாற்றத்தின்படி அவற்றில் 9 பலன்கள் “விருப்பத்திற்குரியதாக” (Optional) மாற்றப்படவுள்ளன.
மருத்துவப் பலன்கள் (Medical), மறுவாழ்வுப் பலன்கள் (Rehabilitation) மற்றும் உதவியாளர் பராமரிப்புப் பலன்கள் (Attendant Care) ஆகியவை மட்டுமே தொடர்ந்து கட்டாயமாக இருக்கும்.
வருமான மாற்றுப் பலன்கள் (Income Replacement), வேலை செய்யாதவர்களுக்கான பலன்கள், பராமரிப்பாளர் பலன்கள், வீட்டுப் பராமரிப்புச் செலவுகள், பார்வையாளர் செலவுகள், கல்வி இழப்புச் செலவுகள், தனிப்பட்ட பொருட்கள் சேதமடைதல் மற்றும் மரண/ஈமச்சடங்கு செலவுகள் ஆகியவை விருப்பத்தேர்வாக மாறுகின்றன.
இந்த விருப்பத்தேர்வு பலன்களைத் தவிர்ப்பதன் மூலம் காப்பீட்டுக் கட்டணத்தில் (Premium) மாதத்திற்கு சுமார் 10 டாலர்கள் அல்லது 5 சதவீதச் சேமிப்பு கிடைக்கலாம் என நிபுணர்கள் மதிப்பிடுகின்றனர்.
எனினும், இதனால் விபத்து ஏற்படும் பட்சத்தில் சாரதிகள் பெரும் நிதி அபாயங்களைச் சந்திக்க நேரிடும் என எச்சரிக்கப்பட்டுள்ளது.
குறிப்பாக, விபத்தில் சிக்கிய பாதசாரிகள் அல்லது மிதிவண்டி ஓட்டுநர்களுக்கு இந்த விருப்பத்தேர்வு பலன்கள் இனி தானாகப் பொருந்தாது.