கனடாவின் அல்பெர்ட்டா (Alberta) மாகாணம் முழுவதும் தற்போதைய வசந்த காலத்தில் ‘பாரஸ்ட் டென்ட்’ கம்பளிப்பூச்சிகளின் (Forest Tent Caterpillars) பெருக்கம் வழக்கத்திற்கு மாறாக கணிசமாக அதிகரித்துள்ளது.
இதனால் Airdrie, Calgary, Olds, Red Deer மற்றும் Lacombe ஆகிய நகரங்களில் உள்ள மரங்கள், நடைபாதைகள் மற்றும் பூங்கா வீதிகள் என அனைத்து இடங்களிலும் பல்லாயிரக்கணக்கான கம்பளிப்பூச்சிகள் கூட்டமாக ஊர்ந்து செல்வது பொதுமக்களிடையே பெரும் கவலையை ஏற்படுத்தியுள்ளது.
இந்தக் கம்பளிப்பூச்சிகள் Aspen மற்றும் Birch போன்ற மரங்களின் இலைகளை முழுமையாக அரித்து மொட்டையாக்கி வருகின்றன.
இது குறித்துப் பேசிய பூச்சியியல் வல்லுநர் Ken Fry (Olds College), “இது ஏறத்தாழ 10 ஆண்டுகளுக்கு ஒருமுறை இயற்கையாக நிகழும் ஒரு சுழற்சி (Population Cycle) ஆகும்.
கடந்த 2025 ஆம் ஆண்டின் கணக்கெடுப்பின்படி, வடக்குக் காடுகளில் 1.7 மில்லியன் ஹெக்டேர் பரப்பளவிலான மரங்கள் இதனால் பாதிக்கப்பட்டுள்ளன” எனத் தெரிவித்துள்ளார்.
மரங்களின் இலைகள் முழுமையாக உதிர்ந்தாலும், ஆரோக்கியமான மரங்கள் அடுத்த ஆண்டிற்குள் மீண்டும் உயிர்நாடி பெற்றுத் தழைத்துவிடும் என்பதால் பொதுமக்கள் தேவையற்ற பீதியடைய வேண்டாம் என அல்பெர்ட்டா நகராட்சிகள் கேட்டுக்கொண்டுள்ளன.
