கனடாவிலிருந்து அல்பெர்ட்டா (Alberta) தனிநாடாகப் பிரியும் பட்சத்தில், பொதுச் சேவைகளைப் பராமரிக்க 13 சதவீத விற்பனை வரியை (Sales Tax) அறிமுகப்படுத்த வேண்டியிருக்கும் என கால்கரி வர்த்தக சபை (Calgary Chamber of Commerce) வெளியிட்டுள்ள புதிய அறிக்கை எச்சரித்துள்ளது.
பொருளாதார நிபுணர் டிரெவர் டோம்ப் (Trevor Tombe) தயாரித்துள்ள இந்த அறிக்கையின்படி, பிரிவினைக்குப் பிறகு அல்பெர்ட்டா 9 பில்லியன் டொலர் நிதியிழப்பைச் சந்திக்கக்கூடும்.
மேலும், வர்த்தக ஒப்பந்தங்களை இழப்பதால் வர்த்தகச் செலவுகள் 5 முதல் 8 சதவீதம் வரை அதிகரிக்கும் என்றும், கால்கரி (Calgary) நகரில் மட்டும் 69,000 வேலைவாய்ப்புகள் பறிபோகலாம் என்றும் தெரிவிக்கப்பட்டுள்ளது.
அக்டோபர் 19 அன்று நடைபெறவுள்ள வாக்கெடுப்பில் பிரிவினைக்கு எதிராக வாக்களிக்குமாறு வர்த்தகத் தலைவர்கள் வலியுறுத்தி வருகின்றனர்.
இருப்பினும், தனிநாடாக இயங்கும் போது அமெரிக்காவுடன் சுதந்திர வர்த்தக ஒப்பந்தங்களை மேற்கொள்ளவும், போக்குவரத்துப் பாதைகளைக் கட்டுப்பாட்டில் வைத்திருக்கவும் அதிக வாய்ப்புகள் கிடைக்கும் என அல்பெர்ட்டா தனிநாட்டு ஆதரவாளர்களான Jeffrey Rath மற்றும் Keith Wilson ஆகியோர் வாதிடுகின்றனர்.