றொரண்டோவின் ஸ்காபரோ (Scarborough) பகுதியில் ஞாயிற்றுக்கிழமை மாலை இடம்பெற்ற கொடூரமான விபத்தில் மோட்டார் சைக்கிள் ஓட்டுநர் ஒருவர் பரிதாபமாக உயிரிழந்துள்ளார்.
மாலை 6 மணிக்குப் பிறகு எல்லஸ்மியர் ரோட் (Ellesmere Road) அருகே உள்ள ஆர்டன் பார்க் ரோட் (Orton Park Road)-இல் இந்த விபத்து நிகழ்ந்துள்ளது.
மோட்டார் சைக்கிளும் மற்றொரு வாகனமும் மோதிக்கொண்டன.
இரண்டு வாகனங்களும் வடக்கு நோக்கிச் சென்று கொண்டிருந்தபோது, ஒன்றுடன் ஒன்று மோதியுள்ளன.
இதனால் கட்டுப்பாட்டை இழந்த மோட்டார் சைக்கிள் அருகில் இருந்த மரத்தில் மோதியது.
விபத்தில் படுகாயமடைந்த 40 வயது மதிக்கத்தக்க மோட்டார் சைக்கிள் ஓட்டுநரை மீட்ட பொலிஸார் மற்றும் மருத்துவ உதவியாளர்கள் தீவிர சிகிச்சை அளித்தனர்.
எனினும், அவர் சம்பவ இடத்திலேயே உயிரிழந்துள்ளதாக அறிவிக்கப்பட்டது.
மோட்டார் சைக்கிள் மிக அதிவேகமாகச் சென்றதாகவும், ஏனைய வாகனங்களை முந்திச் செல்ல முயன்றபோதே இந்த விபத்து நேர்ந்ததாகவும் ஆரம்பகட்ட விசாரணைகளில் தெரியவந்துள்ளது.
றொரண்டோ பொலிஸார் (Toronto police) இந்த விபத்து குறித்து தீவிர விசாரணை நடத்தி வருகின்றனர்.
அந்தப் பகுதியில் இருந்தவர்கள் அல்லது ‘டேஷ்கேம்‘ (Dashcam) காணொளிகள் வைத்திருப்பவர்கள் பொலிஸாரைத் தொடர்புகொள்ளுமாறு கேட்டுக்கொள்ளப்பட்டுள்ளனர்.
