கனடாவின் புகழ்பெற்ற பறவைகளில் ஒன்றான ‘காமன் லூன்’ (Common Loon) வகைப் பறவைகளின் குஞ்சுகளின் எண்ணிக்கை கடந்த 30 ஆண்டுகளில் சுமார் 40 சதவீதம் குறைந்துள்ளதாக புதிய ஆய்வு ஒன்று எச்சரித்துள்ளது.
FACETS இதழில் வெளியிடப்பட்ட இந்த ஆய்விற்காக, கனடாவின் (Canada) 9 மாகாணங்கள் மற்றும் அமெரிக்காவின் (U.S.) 7 மாநிலங்களில் உள்ள 3,000க்கும் அதிகமான ஏரிகளில் சுமார் 49 ஆண்டுகளாகச் சேகரிக்கப்பட்ட தரவுகள் பயன்படுத்தப்பட்டன.
உலகளாவிய ‘காமன் லூன்’ (Common Loon) பறவைகளின் தொகையில் 94 சதவீதம் கனடாவிலேயே வாழ்கின்றன.
பறவைக் குஞ்சுகளின் எண்ணிக்கை குறைவதற்குக் காலநிலை மாற்றமே முக்கிய காரணமாக இருக்கும் என ‘பேர்ட்ஸ் கனடா’ (Birds Canada) அமைப்பின் ஆய்வாளர் மேட் ஃபெர்ஸ்ட் (Matt Fuirst) தெரிவித்துள்ளார்.
காலநிலை மாற்றத்தால் அமில மழை பெய்து ஏரிகளிலுள்ள மீன்களின் வளம் பாதிப்படைவதும், கனமழையால் ஏரி நீரின் தெளிவு குறைந்து பறவைகளால் வேட்டையாட முடியாமல் போவதும் இதற்கு முக்கிய காரணங்களாகக் கருதப்படுகின்றன.
மேலும், படகுச் சவாரி மற்றும் ஈய மீன்பிடிச் சாதனங்களைப் பயன்படுத்துதல் போன்ற மனித நடவடிக்கைகளும் இவற்றின் இனப்பெருக்கத்தைப் பாதிப்பதாகக் சுட்டிக்காட்டப்பட்டுள்ளது.
தற்போதைக்கு இவை அழிந்துவரும் உயிரினமாக மாறாவிட்டாலும், இந்தப் பாதிப்புகள் வடக்கு நோக்கி விரிவடைந்தால் பெருமளவில் பாதிப்பு ஏற்படும் என எச்சரிக்கப்பட்டுள்ளது.
